¡Arrincamos curso do club de lectura QUEERuña!

Como cada ano os clubs de lectura volven ás bibliotecas, unha das actividades que sen dúbida máis aceptación ten entre os nosos usuarios

Axiña terán lugar os primeiros encontros do ano. O 26 de outubro arrinca QUEERuña, o primeiro club LGTB de Galicia, creado no 2016.

As inscricións estarán abertas dende o 16 de setembro, anótadevos  xa!! Participade na vindeira edición de QUEERuña e desfrutade de lecturas e debates. Compartiredes experiencias, opinións e sobre todo diversión a través dun bo libro.

Neste curso leremos a autores como Carlos Callón, Cris Pavón, Iria MisaJuan Naranjo, Nee Barros, Emma Pedreira entre outras e outros. Botádelle un ollo ó lido en tempadas anteriores. Deixámosvos as guías dispoñibles no catálogo das Bibliotecas Municipais por se desexades facervos con elas e comezar a desfrutar.

Podedes coñecer  un pouco máis sobre Queeruña no instagram e no twiter, non perdades detalle das actividades e  encontros que difunden os participantes.

Os encontros serán na Biblioteca Municipal de Estudos Locais  o terceiro Martes de cada mes  ás 19 horas.

Inscribídevos e non quededes sen praza. Agardámosvos!

“Lo que más me gusta son los monstruos”, de Emil Ferris, en Grindr

Como non íamos activar o noso Grindr Bibliotecario cunha das mellores novelas gráficas destes últimos anos? “Lo que más me gusta son los monstruos” é a primeira (e, esperemos, non única!) obra de Emil Ferris, unha autora estadounidense que foi toda unha revelación, e que ten unha historia ben especial.

No ano 2001 a autora, que daquela tiña 40 anos, contraeu a febre do Nilo Occidental pola picadura dun mosquito, quedando totalmente paralizada de cintura para abaixo e perdendo tamén o movemento da súa man dereita. Mentres se recuperaba da parálise, Ferris comezou a dar forma a esta novela gráfica, que aínda que primeiro foi rexeitada por cerca de 50 editoriais, cando por fin foi publicada no ano 2017 tivo un gran éxito entre a crítica e o público, gañando varios premios entre o que se atopa un dos máis prestixiosos no mundo do cómic: o Premio Eisner (levou os galardóns de Mellor álbum gráfico, mellor guionista/ debuxante e Mellor colorista).

Esta novela gráfica conta unha historia sobre os monstros reais e imaxinarios que aparecen no caderno dunha nena freak que quere ser unha detective-lobo. A través da súa propia interacción con ela mesma e cos demais, afondarase na psicoloxía humana, a sexualidade e a súa homosexualidade, a guerra… e o secreto mellor gardado do seu vecindario. O libro ten a forma dun caderno de espiral, o caderno da protagonista, e as súas ilustracións están feitas unicamente con bolígrafos.

Emil Ferris denúdase neste cómic para ofrecernos unha obra con tinturas autobiográficas a nivel emocional, onde a protagonista é unha proxección da propia autora. Aos comezos da súa vida considerouse lesbiana, para logo definirse como bisexual. Ademais, Emil Ferris nunca se sentiu muller, de pequena aterráballe esa idea. Prefire non pensar nela mesma en termos de xénero, xa que considera que é moi reducionista. Por iso, imaxínase coma un monstro. Entón non é casualidade que os dous únicos personaxes homosexuais da obra estean representados como monstros: a protagonista aparece coma unha nena-lobo, e o seu amigo Franklin é unha representación de Frankenstein.

Logo de afondar un pouco nesta obra, activamos o noso Grindr Bibliotecario para ver se hai semellanzas con outras obras do catálogo e…

Match! Match! Match!

Seica temos moitas outras novelas gráficas lóbregas onde os seus protagonistas LGTB viven nun mundo de monstros. Ás veces, literalmente, pero de cando en cando tamén atopamos monstros agochados entre a xente: monstros de carne e óso. Noutras tantas ocasións, os monstros están dentro de nós, son as nosas inseguridades corroéndonos por dentro.

Se queres confirmar o teu match con algunha destas obras, preme no título para ver a sinopse no noso catálogo. Alí tamén verás a súa ubicación e dispoñibilidade, para que poidas ter un encontro ca novela gráfica que elixas e, quen sabe… Igual a cita resulta perfecta e quedas con ganas de mais!

Entrevista con Valeria Vegas

O festival #Corufest sempre nos trae regaliños que son de agradecer. O ano pasado foron tres encontros con Roy Galán (un en exclusiva para nós) e este 2021 foron outros tantos con Valeria Vegas.

Non quixemos deixar pasar a oportunidade de quedar con ela a solas e para facerlle algunhas preguntiñas.

Para a grabación deste vídeo contamos con Lázaro Louzao (director do filme “Nove de novembro“) e para as entrevistas coa compañeira Violeta, da Biblioteca Ágora, e coa escritora coruñesa Miriam Beizana Vigo, que conduciu un dos encontros.

Os libros publicados por Vegas están dispoñibles para o préstamo nas bibliotecas:

Galería de imaxes dos encontros:

LGTB, ODS e biblioteca pública

Como cada 28 de xuño as Bibliotecas Municipais da Coruña sumámonos á celebración do Día Internacional do Orgullo LGTB. Esta data conmemora os disturbios acontecidos no pub Stonewall Inn (Nova York) no ano 1969, que marcaron o inicio da loita polos dereitos das persoas LGTB.

Durante estes días ofreceremos diferentes recursos a través das nosas ferramentas dixitais que se centran na visibilidade das realidades LGTB e na celebración da diversidade, como por exemplo a guía de lectura “As Municipais Entenden 2021”:

Con todo, nas Bibliotecas cremos que é necesario traballar nesta liña de maneira continuada e a longo prazo. É importante resaltar esta reivindicación e loita polos dereitos LGTB no Día Internacional do Orgullo, pero moito mais efectivo é levar a cabo unha serie de accións e actuacións permanentes, estables e planificadas que contemplen diferentes perspectivas para acadar uns obxectivos preestablecidos que se encamiñan a lograr unha total inclusión das persoas LGTB.

Neste sentido, hoxe queremos destacar a relación da Axenda 2030 da ONU e os seus ODS (Obxectivos para un Desenvolvemento Sustentable) cas persoas LGTB e coa labor que podemos realizar nós dende as Bibliotecas ao respecto.

No ano 2015, 193 países comprometéronse cos 17 obxectivos de desenvolvemento sustentable das Nacións Unidas e co seu cumprimento no ano 2030. Estes obxectivos teñen como finalidade a igualdade entre as persoas, protexer o planeta e asegurar a prosperidade como parte dunha nova axenda de desenvolvemento sustentable. Estes 17 obxectivos compleméntanse con 169 metas, que non se poden lograr sen a inclusión de todas as persoas, en especial as poboacións máis marxinadas.

Os 17 Obxectivos de Desenvolvemento Sustentable da Axenda 2030 (ONU)

Como parte desas poboación marxinadas ás que debemos prestar unha maior atención atopamos á poboación LGTB. En relación cos ODS da Axenda 2030, a organización RFSL (Swedish National association for Sexual Equality) di no seu informe For all The Sustainable Development Goals and LGBTI People (2019), que para acadar unha plena igualdade é prioritario centrarnos nos campos nos que as persoas LGTB se ven máis discriminadas: a saúde, a educación, a pobreza, a seguridade, a familia e o recoñecemento legal do xénero.

E que podemos facer dende as Bibliotecas ao respecto? Como centros de información e coñecemento, debemos garantir o acceso igualitario aos nosos fondos, ademais de ofrecer información que contribúa á formación en diversidade e aceptación, para conseguir ser unha sociedade inclusiva. Na Rede de Bibliotecas Municipais da Coruña apostamos por unha liña de traballo especificamente dirixida á inclusión das persoas LGTB, mediante a cal levamos a cabo unha serie de iniciativas e propostas estables e continuadas no tempo. Entre outros aspectos, tentamos:

  • Impulsar a presencia de materiais LGTB co obxectivo de enriquecer o fondo, tanto para un público adulto como para o público infantil. Estes materiais estarán sempre dirixidos á ruptura de estereotipos e a visibilidade das opcións sexuais non heteronormativas ou LGTB para contribuír á súa normalización e, así, loitar contra a LGTBIfobia. Incluímos tanto obras que reflictan a realidade do mundo LGTB e das persoas que o conforman, como todas aquelas creadas por persoas LGTB.
  • Dar a coñecer recursos e realizar actividades e accións dirixidas non solo ás persoas LGTB, se non a toda a poboación para fomentar súa inclusión e a igualdade.
  • Facilitar os trámites coma o cambio de nome e/ou xénero, que se pode efectuar con facilidade cubrindo, asinando e entregando esta solicitude en calquera das nosas bibliotecas (se es menor de 16 anos, terán que asinala tamén as persoas que teñan a titoría legal).
  • Ofrecer e facilitar o acceso libre e sen barreiras á información, educación e cultura, pensando en todas as comunidades que atendemos e poñendo especial fincapé nas máis discriminadas, como son as persoas LGTB. Debemos apoiar ás persoas LGTB e facilitarlles a información, apoio e recursos que precisen.
  • Ser un espazo integrador e inclusivo, onde todas as persoas poden atopar resposta ás súas necesidades e todas as realidades estean presentes e sexan visibles.

Hoxe, Día Internacional do Orgullo LGTB, queremos finalizar este post co mensaxe da Axenda 2030, e unha das nosas metas a acadar: non deixar a ninguén atrás.

Feliz e reivindicativo día do Orgullo!

O derradeiro libro de Emma Olsen

A novela de Berta Dávila, O derradeiro libro de Emma Olsen, foi premiada en 2013 co VII Premio de Narrativa Breve Repsol. A autora, volveu gañar este mesmo premio en 2020 coa obra Illa Decepción. Este é un dos premios de literatura galega que nos da a coñecer novelas breves e intensas, con forte carga emocional e totalmente imprescindibles.

O derradeiro libro de Emma Olsen foi recentamente reinterpretado por Pablo Prado na banda deseñada publicada por Galaxia en 2020.

Con esta novela, Berta Dávila gañou o Premio Guillermo de Basquerville en 2015 como mellor obra independente. Con este galardón recoñécese á autora prometedora na que se convirteu Berta Dávila e valórase a súa experiencia para condensar na narrativa breve unha grande historia.

Ás veces os premios traennos novelas que doutro xeito non recaerían nas nosas mans. Ás veces os premios, que parecen máis pequenos, sorpréndenos e convídannos a explorar novas maneiras de contar. É por isto que o Narrativa Breve de Repsol merece un minuto do noso tempo.

En 2019 Gonzalo Hermo, coñecido polo seu poemario Celebración (Premio Nacional Poesía Joven 2014) leva o premio con Diario dun Enterro, a súa primeira novela.

En 2018 Antón Lopo gáñao cunha novela dura e irreverente que leva por título Extraordinario.

É por isto que é recomendable ter este galardón presente na disxuntiva á hora de escoller lectura.

Nas Bibliotecas Municipais de A Coruña contamos con todos estes títulos e figuran a disposición do usuario para o préstamo.

  • 2017

O Grindr Bibliotecario desta volta, versa sobre os títulos premiados do Narrativa Breve de Repsol.

El bebé verde en Grindr

Abur 2020! E benvido 2021, aínda que por agora está a ser máis raro que un can verde. E para ambientarnos, que mellor cousa que empezar lendo El bebé verde. Porque o verde é tamén a cor da esperanza.

 
 
Este comic é a autobiografía de Roberta Marrero, artista multidisciplinar que canta, escribe, ilustra, é disc-jockey, etc. Nel Roberta da rienda suelta á súa vena creativa influenciada por artistas e músicos dos 80, que lle axudaron a construir a súa identidade trans. Este cómic tróuxonos á memoria outro recente, moi interesante: Mariquita de Juanito Libritos, moi similar en presentación e por tocar os mesmos problemas de homofobia, pero neste caso desde outra perspectiva.

Aínda que xa limos o libro de Roberta hai exactamente 2 anos, dende entón, o mundo trans mudou dabondo: é parte destacada das axendas políticas, con una lei trans en camiño e está en plena vixencia en tódolos ámbitos culturais (como mostra, a serie La Veneno, que seguro moitos virades).

Se queredes seguir lendo algo máis sobre a mesma temática, nas Bibliotecas Municipais da Coruña temos outros comics como son:

Anarcoma: obra gráfica completa / Nazario

Degenerado / Chloé Cruchaudet.

Género Queer: una autobiografía / Maia Kobabe

I.D.: ¿por qué no te gusta tu cuerpo? / Emma Ríos

Justine / Gauthier

Llamadme Nathan / Catherine Castro & Quentin Zuttion

Ranma / Rumiko Takahashi

Unas bollos de cuidado y otras formas de vida singulares / Alison Bechdel

Animádevos a seguir investigando nesta temática na nosa sección de banda deseñada. Esperámosvos!

 

 

 

 

 

Novas incorporacións de narrativa LGTB para adultos

Gústache pasar o tempo lendo unha boa novela? Pois le con atención este post porque hoxe traémosvos as novas incorporacións ao catálogo das nosas Bibliotecas Muncipais, de narrativa para adultos e de temática LGTB. Hai novelas de diferentes xéneros para todos os gustos e que agardamos vos gusten tanto como a nós.

  • Con el amor bastaba, Máximo Huerta. Unha emocionante novela de vida cotiá que pon o foco na única vía de salvación fronte aos desencontros e as diferenzas, o amor.
  • Calypso, David Sedaris. Colección de relatos cómicos onde o paso do tempo, o aburguesamento involuntario e, sobre todo, a familia, protagonizan esta serie de historias nas que o propio Sedaris fai de voz e personaxe principal.
  • La cresta de Ilión, Cristina Rivera Garza. Novela rompedora e de intriga que aborda a identidade e o xénero. A autora disecciona os efectos da violencia e explora os límites do real.
  • Frankissstein: una historia de amor, Jeanette Winterson. Novela de ciencia ficción, que che leva a unha viaxe no tempo divertidísimo e agudo con Frankenstein, alter ego actuais mergullados no mundo da intelixencia artificial, a criogenia e os robots sexuais.
  • Niña, mujer, otras, Bernardine Evaristo. Novela da vida cotiá composta por historias independentes, pero entrelazadas entre si e protagonizadas por doce mulleres de diferentes xeracións, clases sociais, ideoloxías, sexualidades e identidades.
  • Encuéntrame, André Aciman. Para os que leron a primeira parte “Llámame por tu nombre” do autor. Esta novela romántica é a continuación da mesma, e segue a vida de Samuel, o seu fillo Elio e Oliver.
  • Reina, ELizabeth Duval. Primeiras memorias en España dunha muller da xeración Z que aos 19 anos xa é un referente da poesía e do activismo.
  • Las malas, Camila Sosa Villada. A autora constrúe un texto autobiográfico ‘ trans’ sen remilgos sobre os seus anos salvaxes.
  • Lara e Sabela, Ignacio Vidal Portabales. Novela da vida cotiá na que o autor indaga na temática do amor feminino con humor, delicadeza e fortuna.
  • A teoría dos contrarios, Pere Tobaruela. Historia de amor que non entende de sexos, unha historia de polos opostos que se atraen.
  • Boulder, Eva Baltasar. Continuación de “Permafrost” , na que agora a relación entre as dúas mulleres e estable e duradeira. O tema que aborda, é a maternidade e a disgregación da parella vinculada ao nacemento dun fillo.

Xa sabes que se hai algunha do teu interés, soamente debes clicar enriba do título para coñecer a súa sinopse, datos bibliográficos e ubicación para ver en qué biblioteca está dispoñible e así levala en préstamo e comezar a disfrutar dela.

As recomendacións LGTB do Nadal 2020.

Este Nadal, como todos os anos, as Bibliotecas Municipais da Coruña vimos de elaborar unha guía cunha morea de suxestións de libros para agasallar a quen máis o desexedes trátase da Guía de Nadal Historias de Regalo 2020. Son recomendacións para todas as idades, dende os pequenos e pequenas da casa ata a xente adulta.

Neste post queremos destacar a proposta que facemos dentro da sección LGTB e feminismos, que xa é habitual na guía de Nadal:

  • Permaxeo, Eva Baltasar. Novela da vida cotiá para adultos onde a protagonista coas súas dúbidas, presións externas e un remuiño de emocións fan que se sinta soa e incomprendida nun mundo no que non encaixa.
  • SuperUlex, Susana Sanchez Arís. Novela xuvenil dos superheroes da vida, tras pasar por unha leucemia e incorporarse de novo ao instituto, a protagonista, decide utilizar os seus superpoderes para combater a favor das boas causas. Porén, ela tamén está á procura da súa identidade.
  • Oliver Button é unha nena, Tomie de Paola. Conto vermello para nenos e nenas de 6 a 8 anos, un clásico que, dende a emoción e a sensibilidade, anima á autoafirmación e á empatía fronte aos estereotipos e á incomprensión.
  • Elisa e Marcela, Xulia Vicente. Cómic galego de adultos que narra a historia de amor e valentía de Elisa e Marcela, as galegas que protagonizaron un escándalo a comezos do S. XX tras casarse pola igrexa.
  • Superbollo contra la L.E.F.A, VV. AA. Cómic hispano de adultos colaborativo e escrito polo colectivo Parole de Queer. A novela gráfica aprópiase da estética de Superman para reverter o rol clásico do superheroe desde o feminismo e o queer.
  • Entre donas, VV. AA. Conto da vida cotiá para adultos que reúne dez relatos doutras tantas escritoras galegas actuais, diversas en estilo narrativo ou experiencias, pero que coinciden en tomar a palabra e falar con voz propia, colocando as mulleres no centro da historia.
  • No estamos tan bien: nacer, crecer y vivir fuera de la norma en España, Rubén Serrano. Investigación levada a cabo polo xornalista e autor do libro, sobre crecer e vivir sendo queer na España actual. Os protagonistas ven como certos espazos seguen condicionados por un mundo que xulga as súas posicións sobre xénero, amor e sexualidade.
  • Mariquita: una historia autobiográfica sobre la homofobia, Juan Naranjo. Juanito descobre que non encaixa cos demais e no colexio empezan a chamarlle mariquita sen saber que significa. Esta obra persoal conta unha historia universal, a dos marxinados, os diferentes, os acosados.

Se tedes interés en algún deles clica enriba do título para acceder ao documento no noso catálogo e ver todos os datos do mesmo. E se queres coñecer todos os demais materiais que recomendamos para agasallar, pincha no seguinte enlace e accederás á guía completa, onde os atoparás clasificados por idades: ENLACE Á GUÍA DE NADAL HISTORIAS DE REGALO 2020.

Unha marabillosa guía con unha gran cantidade de historias para ler, ver e escoitar e para todos os gustos e públicos.

Os cómics LGTB que acabamos de incorporar ao catálogo…

Se che gusta o cómic non deixes de ler este post, xa que traemos as últimas novidades en cómics LGTB para o público adulto e que de seguro che encantarán.

Cómic galego

  • O derradeiro libro de Emma Olsen, Pablo Prado. A escritora norteamericana Emma Olsen, regresa ao seu pobo natal para afrontar os seus últimos meses de vida afectada por unha enfermidade terminal. Dedicará o tempo que lle queda a escribir un libro.

Cómic hispano

Cómic europeo

Cómic americano

Cómic manga

Que vos parecen as novidades? Se che interesa algunha podes clicar no título de cada unha delas e lévache directamente ao documento para ver todos os datos dos mesmos e a súa ubicación nas nosas bibliotecas da rede. Botádelles un ollo!

Últimas incorporacións LGTB Infantil e Xuvenil nas Bibliotecas Municipais da Coruña

Dende as bibliotecas municipais da Coruña compartimos con vós as novas incorporacións ao catálogo de temática LGTB, para o público infantil e xuvenil.

Atoparedes algún conto para as crianzas da casa e algún que outro cómic e narrativa xuvenil, xa para os máis maiores.

Se che interesa algún, non dubides en clicar máis abaixo enriba do título de cada un deles para ver se está dispoñible e así levalo en préstamo, ademais de poder consultar a súa sinopse, signatura e a biblioteca onde se atopa.